Har du problem med å lesa PDF-filer, kan du henta Acrobat Reader med å klikka her.
Vedtekter for Valdreskvelven spel-og dansarlag
Formål
§1
Valdreskvelven spel- og dansarlag har som formål å samle spelemenn, songarar, dansarar og andre interesserte for å dyrke og ta vare på dei lokale tradisjonane i spel, song og dans.
Lagsverksemd §2
Laget skal skipe til samkomer med spel,song og dans, drive opplæringsarbeid, og ta opp spørsmål som kan fremja folkemusikk og -dansearbeidet
Tilknyting §3
Laget og lagsmedlemmene skal vera medlemmer i Landslaget for Spelemenn.
Styret §4
Styret skal vera samansett av formann (leiar) og fire faste medlemmer.
Formannen blir vald av årsmøtet for eitt år. Styremedlemmene
blir valde for to år, slik at to av dei er på val kvart år.Det
skal dessutan veljast to varamedlemmer til styret og to revisorar for
eitt år.
Styret konstituerer seg sjølv.
Årsmøtet §5
Årsmøtet skal haldast kvart år midtvinters. Alle
sakene som skal avgjerast her, må vera oppførte på
saklista. Saklista må gjerast kjent for medlemmene gjennom rundskriv
eller lysing i lokalavisa seinast to veker før møtet blir
halde. Framlegg til saker på årsmøtet må vera
hjå styret seinast tre veker før møtet, og dato for
årsmøtet må vera kunngjort for medlemmene i god tid
før denne fristen.
Alle som har betalt årspengar til laget har røystrett på
årsmøtet.
Årsmøtet godkjenner framlegg til årsmelding frå
styret og rekneskapen for siste rekneskapsår. Vidare vedtek årsmøtet
arbeidsprogram og budsjett for det komande året, og årspengar
for neste år.
Årsmøtet set kvart år ned ei valnemnd på tre
medlemmer som i god tid før neste årsmøte kjem med
framlegg til nye tillitsfolk i laget.
Omframt årsmøte §6
Det skal haldast omframt årsmøte dersom styret finn at særskilde høve gjer det naudsynt, eller dersom minst ein tredjedel av medlemmene krev det.
Oppløysing §7
Laget kan berre oppløysast av årsmøtet med minst tre fjerdedels fleirtal, og ikkje dersom minst fem medlemmer går mot det. Dersom laget blir oppløyst, og ikkje innan ti år tek opp att arbeidet på same grunnlaget som tidlegare, kan Landslaget for Spelemenn avgjera korleis laget si eige skal takast vare på og eventuelt brukast i distriktet til formål laget har arbeidt for.
Endringar §8
Desse vedtektene kan berre endrast av årsmøtet eller omframt årsmøte med minst to tredjedels fleirtal.
oOo
Vedtektene samrøystes vedtekne på årsmøtet 24. januar 1983.